حبك كلام
*************
ياللي حبك بالكلام
عارفه حب يعني ايه
حب يعني الاهتمام
حب يعني الاحترام
حب إحساس بالأمان
يعني اطمن وانام
واصحي الاقي فيه سلام
حب عمره ما كان كلام
****************
حب ما تخونيش عهودي
حب تحترمي وجودي
ابقي في الدنيا دي سيد
وانتي في الدنيا تسودي
حب مش احراج تخليني
صغير واحمرت خدودي
حب يعني تفكريني
باللي كان أيام جدودي
****************
حب باين في عيوني
حتي لو قافل جفوني
حب يعني كل الدنيا هانت
وانتي لا يمكن تهوني
حب مش محتاج سؤال
حب مش محتاج جدال
حب عمره ما ينتهي
حتي بعد سنين طوال
لسه باين في عيوني
*****************
عارفه انتي معني الحب ايه
اني اسلم لك فؤادي واطمن عليه
ان لا يمكن في يوم هتجرحيه
اني احب اي مكان تكوني فيه
حب مش عبارات بتتقال باللسان
ياللي حبك بالكلام .
من ديوان / حمدينو الشهاوي
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.