...........................الشاعر الوردي دهيمات .....بطلب
........................زهري مدفون ........قصيدة بطلب من صديق
عاونوني يا خاوتي يا حضار ..............ورولي زهري وينو مدفون
يا خاوتي راهي تقوات عليا لضرار ........وفي حياتي عايش ديما مغبون
راحت الوقت الزين مع زهر النوار .......و ربيعي مسكين ياو ضحى بلا لون
حليلي دموعي نازلة كي لمطار ..........من كثرت لبكى راح سواد لعيون
ما ظنيت صحابي يغدرو بيا .................ما ظنيت العشرة أعليهم تهون
شبعتهم حتى سمانو بين يديا .................كي كبرو الخرفان دارو عليا قرون
يا زهري وعلاش درتها بيا..................ولا لعدو يهدر وكان قبل عقون
شحال صعيبة لحياة و الدنيا..................لي يمشي بالخير يقول عليه مجنون
الراجل يقيسوه بالجيب و لمالية ...........و الزوالي عمات عليه لبصار و لعيون
نكتب في لوزان خطيتها بريا ...............و شبعتها بالفن والشعر الملحون
لي فكرو مودر ما يحس عليا..............و كلامي رزين بحلاوتو مفتون
ربي وحدو عالم ما بيا ......................سبحان العالي حاكم هاذ الكون
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.