المسحراتى
الحلقة ( الرابعة عشر ) الخميس
للشاعر/مصطفى فريد
مسحراتى داير انادى
فى كل وادى أقول ياهادى
أحرس ولادى وانصر بلادى
على الاعادى والطماعين
نبضى فى قلبى
بيدق طبلى زى اللى قبلى
جادل فى حبلى بحرى وقبلى.
عناقيد بتضوى بهجة وحنين
يا مسلمين إمدحوا سيدنا النبى المختار
وحيوا ذكرى اللى راحوا شهدا من الثوار
فى ثورة الميادين
حسب الميعاد يا شهيد هنقيم لك الافراح
ومستحيل ننعيك ولا يوم هتبقى نواح
مهما فاتتنا سنين
جسدك صبح فانى وإيه فايدة الأجساد
ما دام الروح ربيع باقى وأجسادنا رماد
وترجع تانى لاصل الطين
با نادى دايما الله ربى وهادى قلبى
فى كل وقت وكل حين
إدعى لربك يغفر لذنبك ويخف جرحك
ويعم فرحك وتروق ملامحك ويمد لينا
شهره الكريم
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.