أبويا الحاج
( قصيدة للشاعر محمد الشرقاوي )
----------------------------------------
( إلى والدي الحاج محمود الشرقاوي عائلة الشراقوة الأشراف بقرية بني محمد
العقب مركز أبنوب محافظة أسيوط حفظه الله وبارك في عمره ونفعني برضاه عني )
----------------------------------------
وابويا اللي جبل صامد
ودينه أساس
بيزرع حب ويعاهد
جميع الناس
على رسم الأمل والخير
على حب النجاح للغير
وراضي بقسمته وعارف
قضا المولى في خلقه يسير
وراس ماله الكرامة وبس
وكلمة طيبة وبسمة
وبجراح الجميع بيحس
فيرسم للهنا رسمة
عيونه
قصتين محبوب
على جبينه
السماح مكتوب
وعند الحق يتكلم
وتبقى كلمته الحاسمة
وقلبه صافي بيرفرف
على الأشجار
وعند الظلم يتحول
كما الإعصار
وتلقى خطوته بحساب
وتلقى كلمته بحساب
في عقله ألف ألف كتاب
بدون تعليم
إشارته عندنا فرمان
عشان بالحق
وقلبه للبشر بستان
أمانة وصدق
ولا بيبكي على دنيا
ولا أموال
جميع لحظة جميع ثانية
رضا بالحال
وهات له غلطة لو شاطر
يا عم وقول
تلاقي الحضن والخاطر
بيان وحلول
أبويا الحاج رباني
على التوحيد
أقول الحق في زماني
وبعده أكيد
حساب المولى يجمعنا
وحب رسولنا يرفعنا
وتبقى للحياة معنى
كأنها عيد
أبويا الحاج عنوان
الكرم بشهود
يدافع عن حمى الأوطان
عشان محمود
وسجادة صلا تشهد
وتوصف للبشر مشهد
دعاه بالخير هنا يصعد
سبع سماوات
وتتحاكى نجوم الليل
عيون طيب وقلب جميل
كلام واضح بدون تمثيل
بدون خلافات
يطول ربنا في عمرك
سنين وسنين
ويحمينا رضا قلبك
يا رب آمين
شرف ليا وبعلنها
أبويا الحاج فوق راسي
ليوم الدين
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.