كرملة ولبان..بقلم "محمد ابو المعاطي"

كرملة و لبان
..........................................
فتحت البخت لقيت جواه كرملة
و مكتوب تحت لا دين و لا ملة
و صور ناس زى العسل تلحسها
بس يا خسارة من جوه تدهسها
و كله بيكدب على كله
و على نفسه لو ملقاش حد يقوله
فتحت البخت و يا ريتنى ما فتحته
بإيدى أنا قلبى جرحته
فتحت البخت و يا ريتنى ما فتحته
بإيدى أنا سرى فضحته
فتحت البخت و حبيت اشوف بختى
كل اللى بان ليا وساختى
فتحت البخت و هجرت ناسى الغلابة
اللى أطهر من مية السحابة
يا ريتنى فضلت عايش وسطيهم
دا المتعرى فيهم يغطيهم
فتحت البخت و لقيت لبان
قلت اندغه قبل ما يلدغه تعبان
و انا اللى عايز احميه طلع لبان دكر
من مره قلت ارميه كاد بيا و مكر
فتحت البخت لقيته كرملة و لبان
قلت بسمله لقيته حية و تعبان
............................................
محمد أبوالمعاطى