(سامحيني يامصر)
بقلم الشاعر(عرفات الامير)
================
سامحيني يامصر
هدتني المحن وغماني الجوع
أنا صريح ومش مفجوع
والعمر اتقتل سافر بلا رجوع
والصبر أهو جبر
والقلب أنفاسه
صبحت حجر
راحت هدر
سامحيني يامصر
مش هاجيب اللوم عليكي
دنا لو أطول إديكي
الكفوف راح تنباس
ومش هاستكتر عليكي
إني أوطي ع المداس
فضلك ماانكرهوش
وخيرك مالمستوش
مش بخل منك
ولكن لأنك
بتدي بالزوفة
وقلبك علي نياته
ماليه الحماس
وعنيكي كدبتها الشوفة
بتعاملي الكل بإخلاص
بتخلطي بين الناس
بتدي الغريب قبل القريب
فاكرة ان الضماير لساها بيضة
لا يابنت الناس الزمن اتغير
وأحوال الناس بدأت تحير
والأمان جبر خلاص
سكنوكي بدل ولادك شياطين
لابسين دقون سودة كماالليل
لابسين قلوب سودة
جواها شر دفين
وبيمثلوا دور الحزين
بيقولوا مسلمين
بس فعلهم غريب حبتين
بيصلوا الظهر ركعتين
وصيامهم مش زي صيامنا
احنا بنصوم عن الزاد
وبنسأل إمتي ياجنة المعاد
لكنهم للدم عطاشي ودياب
وبيزهقوا في ارواح العباد
وبيقتلوا ناس مش مذنبين
وبيقولوا داهو الدين
بزمتكم دا كلام عاقلين
دا قرآنا علمنا وفهمنا
ولا تقتلوا النفس التي حرم الله إلا بالحق
سامعين يامسلمين
وإنتوا ياأهل الكتاب ياذميين
وانت ياارهابي ياخناس
ليه تخلي نفسك صاحب القصاص
ليه تنصب نفسك قاضي علي الناس
هو احنا ناقصين متنطعين
شوهتو صورة دين حنيف
بيأمر بالمحبة وإكرام الضيف
بيوصي علي الجار لو ف العدد سابع
ولو استنجدك جارك
لبيه لوكنت ساجد او راكع
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.