.....حكاية يتيم .....
حلو سوادك خلي السواد عليا يمد
وإبني بيني وبين الفرح مليون سد
طبعك طبع الأفاعي ناعم في موته
والضحكة علي حدوده ليها ألف حد
........
يفرح نهارك لحظة يهل عليه الغمام
يحجز ضحكتي قبل ما ينطق الكلام
ويقدم ألف حزن هدية تقولش غرام
ولو سألتها ليه كده ماألقاش منها رد
.......
حدوتة واليتم كان فيها أول حكاويها
سنين جوا غربة نفس نعيش لياليها
وكل يوم بنا الحزن يحط قالب فيها
بنيت منه قصر فيه ألف حيطة سد
.......
إتحديت ورسمت صورة عني للبشر
صورة شاعر وعاشق قلبه ما ينكسر
في كل صورة حب له برواز مفتخر
وصورة بضحكتها ترضي قلب أي حد
........
سنين عدت وأنا عملة وليها وشين
وش يعرفه الناس مالوش زي إتنين
ووش متداري هو والحزن متصاحبين
وكل ما يقابل ضحكة يلقي منها صد
.......
وبين الأصل والصورة تتوه أحلامنا
وبين الحزن والضحكة تتعجب أيامنا
ويشيب الزمن ولسة مجاش زماننا
وتفضل بيني وبين الحياه حكاية عند
.......
ودي حكاية وبنعيشها زي ما هية
علي وشوش البشر مكتوبة ومحكية
فيها سطور ظاهرة وغيرها مخفية
وسؤال في اليتم صعب تلقاله رد
.......
أيمن بلال
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.