عم صابر ...........
مش بيحلم ...مهما نام
مش بياكل ..غير كلام
ماشي بيكلم ف نفسه ...
و الزمن عمال يعاكسه ...
عم صابر بس نفسه ..
يلقي موته و السلام
عم صابر شكله شكلك
و لا شكلي بالتمام
عمره باعه و ما سألشي
يسوي كام !!!!!!
عم صابر حاله حال
هدوا فيه عزم الرجال
و لما كان يسأل سؤال
يقولوله ...عيب حرام
لخموه ف القوت و قالوا
يخلي باله من عياله
عاش مسلم و اللي طاله
وعود وعود و كلام كلام
عم صابر علموه ...
و فهموه و حفظوه ..
انه يطلع زي ابوه ...
عاش يقول كله تمام
عم صابر له عينين
يبانوا دايما مفتوحين
و ف الحقيقه مغمضين
ولو عاش له الف عام
عم صابر له لسان ...
ريقه ناشف من زمان ...
عم صابر لو جعان ....
عمره ما فك اللجام
عم صابرعاشها عادي
مش ف باله يكون لئيم
ماشي جوه الحيطه عادي
ماشي علي فيض الكريم
عم صابر قالوا مات
ناس قالوها بدمع عين
وناس تقول ازاي دا فات
جنب بيتنا من يومين..؟!
عم صابر بينا حي
ساكن قلب كل حي
ولما صبره ف يوم يروح
هتلاقوه من نومه جي
بيحاسبنا حساب مش عادي
سيد صادق
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.