أهم الاخبار

مجلة نداء الرؤح لفرسان الكلمات رئيسة مجلس الادارة الأستاذه نداء الرؤح )

الاثنين، 15 أكتوبر 2018

مكتوب على باب القصيدة بقلم عبدالعزيزموسى


مكتوب على باب القصيدة 
..........
مكتوب على باب القصيدة
ممنوع الدخول
وانا من قبل ٣٠سنه 
مُبَشّر بالقبول 
ودبحت نذرى على قافيه الحلم
اللى سابح جوة دمى
وقربت الوصول 
تبّت في الحلم 
ومشيت على خطى السابقين 
وبقول 
الحرف علمنى 
بدون الصدق منطقهوش 
ماليش في تغيير الوشوش 
ماليش في الغش 
واضافه الرتوش 
اذا لم أحس المعنى مكتبهوش 
اذا لم أضيف للخلق شئ ينفع 
يبقى حرام النص 
يمشى على الاوراق 
يقابل 
الحالمين 
مع المجاريح 
مع العشاق
ومن فاتهم زمان الحلم
والاشواق
يكون ترياق 
ومصباح لشارع وحيد 
كان واسع وهاجرو سكانه 
اتنسى وهو داق
يكون غنوة ف ساعه صبح 
يوزع ع البيوت امله
وبكرة الجاى بلقا 
بعد الفراق 
يمسح دموع اليتامى
ففجر العيد 
بضحك جديد 
ولبس جديد 
يطوف بيهم سبع سماوات 
كأنه براق 
يبشرهم 
بحوض النبى 
وفى جنه عدن تتحق المواعيد 
وكل شهيد 
فى الجنه كان بيطوف 
ومستنى 
خلاص الحلم بيقرب ماعدشى بعيد 
حرام النص مايكونشى 
حروف بتثور 
وتفتح طاقه للاحلام تشوف النور 
تعلى صوت الهتاف واللمه في يناير 
تخلف كل طلعه شمس ١٠٠ثاير 
وتكتب للوطن دستور 
وتسأل مين اللى مستنى 
ومين بكره عليه الدور 
حرام النص يتنازل عن الاحلام 
بحريه وطن 
ويرضى ويا الخلق يستنى 
عشاه ف طابور
......
عبدالعزيزموسى

ليست هناك تعليقات:

إرسال تعليق

ملحوظة: يمكن لأعضاء المدونة فقط إرسال تعليق.