،،،،،،،،، كبر الولد ،،،،،،،،،
كبر الولد
من غير ابوه
كبر الولد
قوليلي ياما يا وتد
قوليلي ليه نحل الجسد
يكونش ياما دا حسد
ولا عودك م السنين
ياما انبرد
قوليلي ياما يا سند
فاكرة ياما لما كنتي
بتقفيلنا وقفة اسد ..
لو حد فينا يوم
غلط ولا شرد
العصا كان ينزل يطرقع
علي روسنا ياما
ولا طلق مدفع
عمر ضربك ياما
ماكان بيوجع
عارفة ياما ايه اللي
كان بيوجع
غربة ابويا طويلة
ولا كان بيرجع
حزن الولد ..
كان العيال
ف المدرسة
بيسألوه
ويعيروه
فين ابوك وينرفزوه
يرجع والدموع
ماليه عينيه
……………………
يبكي الولد… .
كنتي ياما تشخطي
ليه عيونك تدمع
مفيش راجل
يا وليدي يعيط اسمع
قوللي مين زعلك
نهاره اسود هيطلع
………………… .
قال الولد………
ياما اسكتي دا
انتي حرمة
بإيدك ايه
تعمليه خليكي سالمة
قالتله
انا حرمة
كنك يا ولد
صح اعمي
……………… .
ضحك الولد
وسمع كلام
ما هينسهوش للابد
قالتله صح عينينا
كحلا
وف يدنا الدهبات
لكن لو الزمان
مال مع رجالتنا
بنقف بكل ثبات
ماهو الحريم في بلدنا
رجاله ينقصهم الشنبات
…………………
فهم الولد
ان ابوه مش هيعود
من غربته
وان امه هي
ماله وعزوته
وانه بدونها
راح يتوه ف دنيته
……………
وكبر الولد
وملامح امه
محفورة ف جتته ..
كبر الولد
بقلم / محمد الشيمي
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.