قصيدة (الـــنـــســــــب)
••••••••••••••••••••••••••••. .
قالوا لك قبل ما تناسب
ياواد حاسب
وماحسبتش حساب إن
النسب عيلتين
كمان ع الأصل قال دوَّر
مثل غيره
لا خدت بــ ده ولا التانى
لاغيت الاتنين
ليه إنت بعكس كل الناس
فى أفعالك
وليه ترضى سنين عمرك
تعيشها حزين
ياريت ويَّا النسب تسأل
عن النفسيَّه والأحوال
ياضىِّ العين
مريضهم يبقى متدارى
ومش باين
ساعتها الفاس تحش الراس
فى غمضة عين
تعيش ياصاحبى أيامك
دى متأزِّم
ولاينفع لــ حالتك صبر
ولا صابرين
وتندب حظك النايب
عشان خايب
وكان عقلك فى توهه وكنت
م الغافلين
وصوت فى البيت عليك يعلا
يامتنكِّد
بنبره حاده وبتشبه
غراب البين
م هوَّ الأصل قلنا لك
عليه عامل
وبنت الإيه دى طَب قول لى
تجيبه منين
وليه الأصل ياساده
كدا إتسمَّى؟
لأنه جدوره ممتده
لعمق سنين
عليه أجيال بتتربى
ماهوش لعبه
وعارفه إزاى تعاملنا
بــ شوق وحنين
سمعت فــ يوم بإن الأصل
ده ممكن
تجيبه من سوبر ماركت
و- م الدكاكين
م هوُ إنت بجد تستاهل
مايجرالك
عشان إنت مانقِّيتشى
ولا اخترتش
بــ نَص الدين
...........................................
الدكتور/
خالد عبد الحميد خربوش
من ديوانى المعنون:
معنى كلمة شعر إيه؟
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.