رباعيات يائسة
ما أقدرش أقول ولا اجادل
وعارف ان ربنا عادل
وحكمته اني اتعذب
بقلبي ولا اقدرش ابادل
قليل البخت في حياتي
وعمري ما لقيت يا ناس بختي
مشيت حياتي بلا خطوة
وياما يا دنيا دوختي
اخدت مني احلامي
وضاعت فيك ايامي
ولما بتيجي شمس الصبح
القيكي تخشي تنامي
رسمت فيك كده ودادي
وفضلت طول عمري انادي
ولما عرفت طريق الحب
سهتيني وسرقتي ولادي
مكتوب على يا دنيا وحيد
لا صوت لا همس لا نبض وريد
في كل ساعة اعيش الموت
بس فينه يا خسارة بعيد
عصفور ضعيف منزوع الريش
بيقول خلاص ما انا عايز اعيش
ونفسه يروح بعيد ويغور
من دنيا قاسية ما بتديش
يحيى حسين 27 يناير 2020
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.