بقايا حروف
من ديوان/سيبنى أحلم
للشاعر مصطفى فريد
يا فايت قلبى يتألم
بعيد عنك
وسايب عينى سهرانه
بتبكى وانت مش همك
وتسأل حتى نجم الليل
دا فين انت
فراقك طال وزاد همى
حيطان الدار بتسألنى
عن امبارح
عن الورد اللى كان طارح
فى ليل حبك
حرام اشكى الضنا بعدك
وتدبحنى سنين بعدك
واعيش الغربة بين أهلى
واحس بعمرى يتسرسب
من الوحدة
واشوف يومى بيتبدد
من الذكرى
تمر ببطئ جوايا
ثوانى بحسرة تتألم
وانا عايش لأحزانى
لا. أنا باحكى ولا. اتكلم
ومين يقدر فى لحظة خوف
فى عمق مشاعره يتحكم
أنا ودى
تعود من تانى أيامك
تدفينى من الغربة
توضينى فى أحلامك
بتسألنى كتير الناس
فين انت
واتشاغل عن السائل
واتذكر نهايتنا
ولا. يبقى سوى منديل
وبقايا حروف محفورة
وسواد الليل
وتوقيعك على الصورة
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.