نداء لأمير المؤمنين........
يا أمير المؤمنين...
تعالي شوف جرالنا إيه
تعالي شوف المسلمين
والحال اللي بقينا فيه
تلقي الناس جوة المساجد
قاعدة تصلي ليل نهار
اللي راكع واللي ساجد
واللي خايف يخش النار
تلاقي الناس جوة المحاكم
بيردوا لبعض الإعتبار
ومتلاقيش قاضي ظالم
ولافيش حتي طول انتظار
وفي المدارس الكل دارس
إزاي بنزرع الأشجار
وفي البيوت بيعلموهم
إزاي نحفظ حقوق الجار
مش ده كله إفتخار ؟؟!!
وفي الشوارع تلقي الزبالة
بيشيلوها بإستمرار
وأي حاجة تبوظ بسرعة
يصلحوها بإقتدار
والمية حلوة والأكل طازة
لحمة كانت أو خضار
ولافيش مركب في البحر تغرق
ولا حوادث بالقطار
مش ده إسمه إزدهار ؟؟!!
ومفيش فساد ولا عناد
ومفيش خيانة ولا أشرار
ولا تحرش بالبنات
واللبس حشمة مع الخمار
يا أمير المؤمنين .....
تعالي شوف الإنبهار
يا أمير المؤمنين .....
عايز أقولك بإختصار
عايز أقولك حاجة واحدة
إحنا حققنا إنتصار
مانت عارف كل حاجة
مش إنت صاحب القرار ؟؟!!!!!
وعجبي
كارم والي
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.