طيف ريدي
حتى الليل مازال راقد
و حتى النوم طالب زيادة
كان البال جافل و شارد
ستاقدت مفجوع على غير رادة
تلفتت للصبر نلقاه حامد
كملتلا بفروض العبادة
يا وقت لاش كي الغيم بارد
من وين جيناك حدفت الرشادة
عاندتك يا ريح ثماش تتهد
زودتلي في الحدادة
نحساب ليام بالوقت تتشد
ليل باهت طاغي سوادا
يا ناس عامين بالعد
لا رتحت لا رمت الوسادة
جاني رجاك و رشمتلك حد
نراعيك تطلب زيادة
مدايرك صاحبي ما حاسبك ضد
غدار كي النار الصهادة
سحرتني بالزين و القد
و القلب طاغي سوادا
لا غبت نا عليك ننشد
كل ما يحدر لوادا
مرات نشتاق للخد
رطب طاب على غير عادة
مرات تجي اليد في اليد
و العين في العين نشادة
يا قمر يا نجوم تشهد
يا طيور في الجو غرادة
ارتاح يا بال و اهمد
طيف ريدك عاود مرادا
تلقاه بالحب و الود
و اعملا من اسمك قلادة
من ريقها كيف نورد
نرويك يا قلب بزيادة
نرجاك يا قلب تسعد
في القلب ملكتها شهادة
طيف ريدي كي الجزر و المد
يلعج كي البرق لا نادا
راعيت في العين لسود
بصيص نور مع طيفي يتعادى
طيف ريدي كي الريح لا شتد
يحرك في النار باعوادا
لا رتاح يهفت ، يتمد
يا عروق غوصي في سمادا
من شجرتا يديرلك عمد
من ورقتا يديرلك ضمادا
لو كان عالجرح مسد
يرتاح ضيما و سهادا
يا ريم كي جيت تشهد
انبيك على ارض ولادة
طيف ريدي لاكان بنعد
التاريخ شدلا زنادا
نشن في الحين و جبد
كل ريد يقصد مرادا
في الحين جاني بالرد
فارس متقلد جوادا
قداش في عيونا مسهد
كي الام وقت لولادة
خيال ريدي لا قرب زود
باينات ، باقصات امجادا
خيال ريدي لا بعد سقد
لايحات اوقات غرادا
طيف ريدي نور و شهد
مالخير و الود زادا
لارتاح و في محبتي زهد
في الحين يركز وتادا
خيمات بالنور تشهد
زاهيات ، باهيات عمادا
حب ريدي اليوم و الغد
عايدات ، اوقات معتادا
الهاشمي البلعزي في 27.09.2020
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.