أَصْل الدُّنْيَا بقلم الشاعر أحمد شاهين

أَصْل الدُّنْيَا

ــــــــــــــــــــــــــــــــــــــــــــ

رَبِّـــي اوْلاَدَك عَ الأَخْـــــلاَق

عَلِّـــــمْ أَهْلَك عِلْــــــم يِفِيـــــد

خَلِّي تُكَــــــالَك عَ الــــــرَّزَّاق

مَهْمَا تْكُــون نَاشْفَــه حَـــــدِيد

بُكْـرَه الــــوَرْد هَيِطْــرَح لِيـك

هَتْلاَقِي الفُـــل مَعَ الرَّيْحَـــان

مَادَام الخِيـــــر مَنْبَعُـــه فِيـك

عُمْـر مَايِيجِي عَلِيك شَيْطَـان

اِرْمِي بْـذُور الطِّيبَه فى أَهْلَك

اِرْوُي دْمُـــــوعْهُم بِالإِحْسَـان

رَبِّ الطِّيبَـــــه رَاح يِنْــدَهْلَك

أَصْلُه دَا رَبّ رَحِيـــم حَنَّــان

أُوْعَى الذِّكْـــر يفَـارْقَك ثَـانْيَه

حَصِّــنْ نَفْسَــك بِالقُـــــــرْآن

أَصْل الدُّنْيَـــا دِي كُلَّهَا فَـانْيَه

مَا يِفْضَل فِيــــهَا إلاَّ الرَّحْمَن

خَلِّي الآخْرَه مْعَاك وِفى بَالَك

وِاوْعَى تَاخْـــد الدُّنْيَـــا عْنِيك

رَاح تِتْحَاسِب عَلَى أَمْـــوَالَك

كُل جَوَارْحَك شَـــاهْدَه عَلِيك

رَبِّـــي اوْلاَدَك عَ الأَخْــــلاَق

عَلِّــــمْ أَهْلَك عِلْـــــم يِفِيــــــد

خَلِّي تُكَــــالَك عَ الــــــرَّزَّاق

مَهْمَا تْكُــون نَاشْفَــه حَــــدِيد

ــــــــــــــــــــــــــــــــــــــــــ

كلمات الشاعر أحمد شاهين

...... مصر .. أسيوط ......