طار اليمام
--------
بقلمي - عادل عبد الرازق
----------------------
في شوارعك يا حبيبتي
فايت .. وحزين
في دروب الأيام
وحواري الأحلام
عصفور متشعلق في خياله
مستغرب على حيرته وأحواله
" كل الشوارع تملكك
وكأنما أنت الهواء "
وتدور ترفرف في المدا
رغم السراب
رغم العذاب
رغم حزن الوتر والأنغام
...
إمبارح كنا وكان
في شارعنا سمانا بتغيّم
والبرد حواري وحيطان
والقلب المكسور يتألّم
البنت فردت شعرها
قرّبت منها أضمّها
فرّت ما بينّا الريح بلاد
صحي وجع الروح
بعد ما كان غفل ونام
...
إنتي وانا لمّا افترقنا
زقزق العصفور دموع
قفلنا شبّاكنا ودخلنا
واللب أصبح موجوع
مش فارس يا قلبي ومصدّق
إنك متمرّد عالأحوال
ولا كان لك بحر ولا شطوط
ولا نورس حتى ولا رمال
بعت عمرك على الفاضي
ولا سألت التمن كان كام
...
لو فرسك يصهل أوصل لك
من أخر الحارة لأول حيّ
بس الغيم متشجّر طرقات
مانع عنا ملامح الضيّ
البحر البعيد كان مرسمك
عاش يعشك عاش يحلمك
دلوقتي بحرك يا قلبي
يا قلبي بحرك ضلام
...
كان يا حبيبتي وياما كان
الشبابيك صبحت حيطان
واللي خان زمان
دلوتي برضه هوّه اللي خان
القمر اللي اتشقق على شبابيك الحيً
كان شاعر عاشق لجمالك
ملّ ضفايرك لمّ اتسجنت على صدرك
أعلن إلحاده بكل غرام
...
ملحدة شفايفك وعيونك
وأنا أرفض أشكال الحرام
غار قلبك لمّا رفض حبي
نطق الصنم طار اليمام
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.