أهم الاخبار

مجلة نداء الرؤح للشعر والأدب رئيسة مجلس الادارة الأستاذه نداء الرؤح )

السبت، 30 يونيو 2018

المدينة ... واحنا بقلم عادل عبد الرازق



المدينة ... واحنا
---------------
بقلمي - عادل عبد الرازق
-----------------------
الطريق د كان طريقنا
إنتي وانا مشينا فيه
نفس البيوت نفس السكوت
نفس الشجر اللي مداريه
بس الحاجات مش هيّا هيّا
إتغيّرت شكل ومعاني
...
فين يا طريق ضحكتك
فين قناديلنا ف سكّتك
فين البيوت فوقها الصباح
فين البيبان فاتحة براح
فين انت قوللي يا عنواني
الطريق د كان طريقنا
إنتي وانا مشينا فيه
نفس البيوت نفس السكوت
نفس الشجر اللي مداريه
بس الحاجات مش هيّا هيّا
إتغيّرت شكل ومعاني
...
يا مدينة إحنا جينا
للذكرى للشوق ولماضينا
هنا رسمنا حلمنا
هنا لقينا نفسنا
عشنا الدقايق والثواني
كل الحاجات مش هيا هيا
اتغيّرت شكل ومعاني
...
راح السكوت لحظة كلامنا
بدا الصراخ يملا أيامنا
وابتندت تنكسر المشاعر
واللي سافر والله هاجر
يا طريقنا ماعدش تاني
كل الحاجات مش هيا هيا
اتغيّرت شكل ومعاني
...
توهنا ولاّ نسينا الطريق
ولاّ السحاب لونه غميق
ولاّ المدينة مش مدينة
ولاّ عينينا مش عينينا
ولاّ يا زماني مش زماني
كل الحاجات مش هيا هيا
اتغيّرت شكل ومعاني
...
متهجّره كل الحاجات
في الشوارع والحارات
شكلها مش شكلها
ملامحها مش لون وشها
والألم مالي الأغاني
كل الحاجات مش هيا هيا
اتغيّرت شكل ومعاني
...
يا مدينة ده شىء محال
ده حلم ده ولاّ خيال
ازاي نصدّق كل اللي كان
والبيوت قافلة البيبان
والشبابيك سدّي وحيطاني
كل الحاجات مش هيا هيا
اتغيّرت شكل ومعاني
...
يا مدينة مجد وممالك
يا مدينة إيه جرالك
الدروب دي مش دروبنا
الغروب ده مش غروبنا
والقوارب من غير مواني
كل الحاجات مش هيا هيا
اتغيّرت شكل ومعاني
...
الهموم مالية الطريق
والطريق من غير صديق
والقمر هارب وغارب
والشموس لون المغارب
ما بين مكانك ومكاني
يا حبيبتي كل الحاجات
اتغيرت شكل ومعاني
...
الطريق د كان طريقنا
إنتي وانا مشينا فيه
أصبح في لحظة مش طريقنا 
وبيرفض اننا نمشيه
الحاجات مش هيا هيا
إتغيّرت شكل ومعاني
...
يا هلترا طرح الميلاد
جنين بموته له ميعاد
ولاّ الزمان قدر يخون
ورسم بغدره كل لون
يا مدينة طب مين اللي خان
كل الحاجات مش هيا هيا
اتغيرت شكل وكيان
...
يا حبيبتي في الشوارع
دوّارين وطريقنا ضايع
مكان لؤانا أصبح مفارق
والبحر غدار وغارق
زيه زي الدنيا والزمان
كل الحاجات مش هيا هيا
اتغيرت شكل وكيان
...
جزيرة وفي بحر حزنها
لون الهموم على سنّها
والمراكب مكسور شراعها
والشطوط ضايعة ف ضياعها
والمراسي صبحت حيطان
كل الحاجات مش هيا هيا
اتغيرت شكل وكيان
...
الحزن ساكن في المطارح
والريح جروح جرحت جوارح
ضاع البشر ضاعت ملامح
وانا قلبي ماشي وسارح
ليه الرحيل سكن المكان
كل الحاجات مش هيا هيا
اتغيرت شكل وكيان
...
هجرت جذور الأرض أرضها
كسرت جسور النبض نبضها
إنكسر جوّانا ألف شىء
والشطوط حضنت غريق
والسما غيمة وغيوب
كل الحاجات مش هيا هيا
ياترا هوّه ده المكتوب
...
عش الطيور من غير طيور
والمدا متشجّر بسور
من عيدان الضلمة الغميقة
خانقة اللي كان شكل الحقيقة
وشمس بتودّع الدروب
كل الحاجات مش هيا هيا
ياترا هوّه ده المكتوب
...
يا دروب يا مهجورة مدا
باصرخ بصوتي والصدا
واسأل سؤالي ألف مرّه
فينك يا ماضي وفينك يابكره
وليه الذنوب رافضة تتوب
كل الحاجات مش هيا هيا
ياترا هوّه ده المكتوب
...وانتي وانا والذكريات
ماشيين الشوارع والحارات
نسأل سؤالنا بالساعات
والجواب هوّه السكات
والصرخة همسة تدوب
كل الحاجات مش هيا هيا
ياترا هوّه ده المكتوب
...
الطريق ده كان طريقنا
إنتي وانا مشينا فيه
صاحبتنا فيه الغناوي
وعزفت أغانينا إيديه
كل الحاجات مش هيا هيا
اتغيرت كل الحاجات
...
مستحيل تتغيّر المدينة
مستحيل
يمكن انتي وانا
أمّا المدينة مستحيل
لابد شىء فينا انكسر
لابد لعبة من لعب القدر
أما المدينة ألف لا
والدروب دي ألف لا
والطريق ده ألف لا
والبيوت والسكوت
كل المدا كل الحياه
المدينة هيا هيا
والدروب دي هيا هيا
وانتي وانا يا حبيبتي
لاانا أنا ولا انتي إنتي
لاانا أنا ..
ولا انتي إنتي
***

ليست هناك تعليقات:

إرسال تعليق

ملحوظة: يمكن لأعضاء المدونة فقط إرسال تعليق.