***(( مصرأم القيم ))***
*********************
يامصر إيه اللى جرا
للضمير والدم
والكل عامل عنترة
وهو حاله يغم
ورسم طريقك لورا
وعاملى فيها مهم
وهو نازل بعترة
للى اتبنى واتلم
وخلى حياتنا متبعثرة
والهم فوق الهم
وشمعتك كانت منورة
وانطفت بالظلم
وحابب يعيش الدكترة
وهو فى القراءة أم
وحروفه بالكتابة متنتورة
ولابيفهم ولابيصم
وداخل فى حال الورى
يشتمهم ويذم
والمتغطى بيه عرى
وعينه زى السم
حقد وحسد وافترا
ولاعنده ريحة الدم
النوع ده جابنا لورا
وقتل الصديق والعم
كانت قيمنا مفخرة
وترابيزة واحدة تضم
ولقمتنا لوصغيرة
تكفى الكتير وتعم
والدنيا لو ممطرة
يغطينا اللى له كم
والشمس تطلع منورة
وتدفى القلوب وترم
والنسمه بالمسك متعطره
تشرح صدورنا ونشم
خلوا حياتنا متأخرة
وابو الهول شتم الهرم
ولما السواح جت تزورنا
مالقوش عندنا كرم
وابن اللذين قال عليهم
جايين يعبدوا الصنم
مع ان العمل بالنوايا
مش بالظاهرولا القسم
وكتير من الخلق راحت
تحج فى الحرم
ورجعوا زى ماراحوا
وفى الشرلاذ واعتصم
وشارك إبليس ف أوزاره
ومعاه الذنوب إقتسم
يا مصر كتير من النوايا
خيرة وجيشك نعم
ومفيش حاجه اسمها جماعة
ولاجمعية تاخد دعم
وأحزاب تتاجر بالبضاعة
وتشتكيكى فى الأمم
ورموز كتير تاخد براءة
وهم يستاهلوا ضرب الصرم
عشان بلدنا مش بالوراثة
لأ بالكفاءة تحترم
وزير ينام ع الموسيقى
وهو مايصلحش راعى غنم
وعاوز يمشى فى انتفاضه
ويهيج الشعب المحترم
ويوظف قرايبه مش الغلابة
فين الضمير والذمم
لما البلد صبحت ديابة
تنهش وتاكل اللحم
شوفو رئيسنا ونشاطه
واخلاصه شىء يحترم
زودتم عليه أعباؤه
بدل ماتشدوا حيلكم والهمم
جايبك يا عبدالمعين تعينه
أتاريك جى تنتقم
هيحارب بره واللا جوه
واللا يصلح خراب الذمم
واللا يعالج ظروف البلد
وحال المواطن من العدم
ياريت يا مصرى تصحى
وتبنى مليون هرم
وتشوف شغلك بزمة
وضمير حى وقيم
وبلاش شغل الفكاكة
وتمل فيها بورم
علشان خاطر بلدنا
تعلى فوق القمم
ونسيب تراث لولادنا
تتباهى بيه الأمم
والفقر عمره ماكان عيبنا
الفقر فقر القيم
***************************************
&& بقلم * *(عبدالفتاح التلبانى )** المحامى &&
***************************************
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.