***نغم***
علي صوت نغم ناي وربابة
بنعي زمن الغرابة
شايفنهم شكل البشر
وهما حال الديابة
بيضحكوا ف الوش
والغدر طبعهم
عايشين بمليون وش
واحترت ف امرهم
استحلوا طعم الغش
والقسوة ف دمهم
كل ما امشي خطوة
يصرخوا يقولوا كش
اسكت واقول معلش
وارضي ان اعيش جنبهم
قلبي كما عصفور
طاير ف كون اخضر
مستني خيط من نور
يملا لي عيني ب ضي
وانا حالي ماله زي
مطحون ك حبة رمل
جوه رحاية الزمن
طحنوني ورموني
باعوني بارخص تمن
وانا برضه مستني
عايش وبغني
اه يادنيا كدابة
فكرتك جنة
طلعتي غابة
وعلي صوت نغم ناي وربابة
بهرب بدمعي لنوحي
مشتاق لبسمة امل
تداوي لي ف جروحي
*** مني فهمي ***
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.