ضمير العالم......للشاعر / مصطفى فريد

جزء من أوبريت / ضمير العالم
من ديوان / أفتكر لك إيه
للشاعر / مصطفى فريد

ياضمير العالم يا عزيزى
يامراعى حقوق الانسان
باناديك والصرخة بتكوينى
والقلب بينزف حرمان
مش عايز حرب تصحينى
من نومى على صوت بركان
إرحمنى إرحم تكوينى
أنا طفل ومحتاج لحنان
ياضمير العالم يا عزيزى

أنا طفل قلبى لسه أخضر
مقدرش أشوف الأحزان
فى عيون الأطفال قدامى
بتموت فيا الإنسان
وبتقتل جوايا الفرحة
وبتسرق مني الأحلام
لو أرضك تقدر تتكلم
ح تقول لك أنت الخسران
يا ضمير العالم يا عزيزى

إتحرك ياضمير العالم
حرر نفسك م العبوديه
القوة ماهياش دايمه لك
والأرض ماهياش أبديه
الأرض عشانى وعشانك
مخلوقه لكل البشرية
بسلامك إسعد أطفالك
نسيهم زمن الكراهيه
ياضمير العالم يا عزيزى

كفايانا شعارات وهميه
ووعود بطفولة ورديه
عيشنا فى زمن أحلامنا
مش زمن الحرب الذريه
خلينا نحس بطفولتنا
فى أوروبا وآسيا وأفريقيا
وفى باقى القارات السته
بنادى تمسح دمعتنا
ياضمير العالم يا عزيزى