ياك كانت النية....... بوسبولة المحجوب

//////+++ ياك كانت النية+++//////
وزمان كان وكانت لحباب
ياك كانت الكلمة بين صحاب
ديك لمحبة كانت بصواب
ياك كانت النية وكلشي غاب
ديك لمحبة تشفي لبدان
كان لمحضار يقر القرءان
لهنا مونسنا ف كل مكان
كان كان كلشي في داك زمان
ياك كان النادر كالعادة
كان الاخلاص ولعبادة
كنا كنا حضارة وسيادة
ونسيينا وحنا ف عنادة
كان الديك يصيح ف الثرعة
كان الفرح والناس مبرعة
كانت القمحة قسمة مكرعة
كلشي ياك راح سافر بسرعة
كانت الجدة تحلب لحليب
ياك كان جدي حاضر ميغيب
كانت لقصايع لاهل الطيب
وافين فين داك زمان لحبيب
كان صوت الشكوة يتردد
كان العصفورفوقنا يغرد
كانت الكاعة بالخير تسعد
كل يوم علينا تتجدد
كان جمع لقبيلة والبراد
كلمة وحدة بكلام لجواد
كانوا يسقيو من داك الواد
والبير مافيه قراب وبعاد
كل اسبوع مشتاقين لسوق
كل حاجة فيه ياناس تروق
شايفين صاغين لداك البوق
خليني نتخيلك بالشوق

//////+++ بقلم صقر الحروف الزجال بوسبولة المحجوب +++//////