انتصار الحب
(انتصارالحب)
رغم طول البعد والمسافات
رغم ويل السهد والآهات
رغم ارتفاع الموج على شط التلاقى
رغم احتضار الشوق
فى الوقت اللى باقى
كان قلبى حاسس ان الحب راجع
هيهد سد البعد ويمحى المواجع
ويسد فى عيوننا الحزينه
ينابيع المدامع
تعرفى ليه ياحبيبتى
لأننا م الصعب جدا
ومستحيل ننسى اللى فات
رغم طول البعد والمسافات
💔💔💔
حاولت تبعد
وحاولت ابعد
كام سنه فاتت وراحت
والألم نامت جراحه
بس ماقدرناش نموت
حبنا اللى عاش صباحه
لا الشمس خافت من الغيوم
ولا القمر تاه فى الظلام
ولا النجوم يوم ضلمت
ولا طير غرامنا ساب جناحه
تعرفى ليه ياحبيبتى
لأننا م الصعب جدا
ومستحيل ننسى اللى فات
رغم طول البعد والمسافات
💔💔💔
تعالى بالشوق والحنان
باحبك اكتر من زمان
داللقى حضن الأمان
والفراق وقفت رياحه
والكلام عبر السكات
رغم طول البعد والمسافات
💔💔💔
الحب أقوى من السفر
ومن الزمن ومن الهروب
الحب كان لينا قدر
ومين يغير المكتوب
الحب لازم ينتصر
لأنه بيعيش فى القلوب
دالقلب اللى داقه مره
عنه مابيقدر يتوب
ولا يهرب م الذكريات
تعرفى ليه ياحبيبتى
لاننا م الصعب جدا
ومستحيل ننسى اللى فات
رغم طول البعد والمسافات
💔💔💔
ورجعنا من غير معاد
كأننا عشاق جداد
كأننا لايوم بعدنا
ولا تهنا فى دروب البلاد
وف لحظة الأفراح نسينا
جرحنا وصوت الآهات
رغم طول البعد والمسافات
كلمات
شاعر الإحساس
رضا عبد الحميد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.