اعز الناس
يعنى ايه أم ! يعنى مفيش هم
اشيله و بيه انشغل و اهتم
مفيش أم ! دى حاجة تغم
و تخليك دايما فى الهم
انا فاكر زمان كلمة تعالى اتلم
و اجري و اخاف م الاهانة و الشتم
تمسك ودنى و تضربنى ضربة ام
كانت دايما بتعلمنى كل شيئ مهم
و كل يوم الصبح بدرى عركة متتلم
اصحى يلا روح المدرسة ... و لكتبى تلم
تدينى المصروف بزيادة ..
ادى ربع جنيه محترم
رحت لعمك رحت لخالك
من زيها ف صلة الرحم
و فاكر لما كنا انا و اخوى نتعارك
تبقى بنا حكمة و حكم
انتو خوات متخلوش بينكم ظلم
سخن .. عندك برد .. حاجة وجعاك
كل حياتها عليك حسرة و الم
كانت طبيب قبل الطبيب ما يشوف الالم
و لما بسافر الاقى كل حاجة مترتبة بالتمام
نصايح وكلام لو سمعته يخليك فى القمم
متنساش تاكل قبل ما تنام
و بطل الشاى اللى مخلى صحتك مش تمام
مين ف الدنيا يخاف عليك زى الام
و فى يوم الاربع طلع الصبح عادى
و فك الظلام
كان يوم مش زى بقيت الايام
الحق هات عربية بسرعة
عالمستشفى بطل كلام
وفي المستشفى كان قضاء الله تم
ماتت الام
ماتت الام ... لا لا ده حلم
زلزال يهز وجدانك تحس ان حياتك عدم
لما ماتت عرفت ساعتها إن اليتيم
مش يتيم الاب لا .. يتيم الام
البقية ف حياتك كلمة صعبة
لما تسمعها على اعز الناس
يللى عندك ام عايز ايه تانى
كنوز الدنيا كلها معاك بس انته مش داري
فالو الموت يبتدى كبير
و بعدين بيصغر و بكره تنسي
قلت : الا فراق الأم
عمري ما هنسي
عمري ما هنسي
عمري ما هنسي
كلمات / رجب كامل ابوزيد
سوهاج - مصر
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.