بؤس ولا الأمل مات
==========
بؤس مرسوم على الوشوش
ناس ف الساقية عا بتدور
الراجل طول النهار شقيان
والشمس على الجبين
ف الآخر ياخد شوية قروش
راجع البيت لطلبات مابتنتهيش
الواد عايز مصروف
والبنت عايزة دروس
والست عايزة تاكل وتعيش
طيب منين يامسكين
روح موت ياشيخ شهيد
أحسن من الهموم والجوع
أسعى ياعبد ربك معاك
المسألة حياة
وخلايق عايزة تشرب وتاكل وتعيش ذى الباقين
كبير بيتحكم فيك
مش دريان ولاحاسس بينا
اصل إحنا صغيرين مش بينين صغير ذى الدود تعبان وشقيان
وبرضوا مافيش
دنيا ذى القطر والناس درجات
ناس راكبين فى أول درجة
تكيف وسيجار وكمان تيك اوى
والدرجة الثالثة دى سبينسة
راكبها ناس شقيانه رمه
سيبكم منهم وضحوا بيهم
علشان الكبار تكبر وتكبر وتعيش
بس هس مفيش كلام
الحيطان لها ودان
خلاص اتخرسنا بالمزاج
غصب غصب ياعم
تقدر تتكلم ولا تقول لاء
طيب إطلع وعلى صوتك
إتكلم واستغيث
واصرخ بأعلى صوتك
حيقلولك إخرس يامجنون
ومش بعيد تبات فى السجن
وبرضوا سجنك حيكون سبنسه
اصل المزرعة للدرجة الاولى
مرتاحين ومتنعمين
صحيح عالم مجنون
ما كلنا بقينا مجانين
اضحك ياشيخ وعيش
أحسن بكره حتصبح
تلاقى تسعيره جديدة
للضحكة النضيفة
أما القلوب السودة
وفكر التضليل
دوول مسألة جارى فيها
البحث والتحقيق
ياترى حيجى يوم
ويبقى الأكسجين النظيف
بالدولار واليورو
والعادم للناس المهاويس
إتريق ياعم على كيفك
قول ديمقراطية ولاحتى حرية
هو حد سامع أصلا صوتك
نعيش مجانين مهاويس
مادام الأمل عند الغلبان بح أنتهى
والفرح من زمان خلص وإتنسى
أوعى ياعم تفهمنى غلط
دا مجرد كلام ناس مجانين
ممكن يكون تهيس ولاحتى غضب
نهار ملحوس أحسن
نطلع فالآخر ضد البلد
ولاحتى ضد السامية
والسلام الدوليين
هس الحيطان لها ودان ياجدع
دا مجرد هبل ولاحتى عبط
كلنا يلا على مستشفى المجانيين
الدنيا أصلها بقت تفصيل
مش لينا لا للدرجة الاولى
وأخرس خلاص الكلام ممنوع
والزعل مكفول للجميع
بس بدون صوت
بقوة دستور وقانون المطحونين
بقلم / حنان سلام ...
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.