قصائد قصيره 47 *** بقلم السيدابوطاحون
*********
طب اعمل ايه ؟
والشعر
لما يشوف عيونك يتولد
و الورد
من كتر المدد
عمال يوزع
في جماله ع البلد
ما فات
لا بنت ولا ولد
هو انت فاكره
أن انت حاجه قليله
ولا انت واحده والسلام
جوه العدد
دا انا قلبي بيشوفك
وبينادي مدد
*********
ياللي عيونك
جننت أجدع ولد
داري عيونك
والبسي نضاره
ولا اقول لك
ماتدخليش الحاره
خايف على نفسي
من عيون جباره
قبل الوصول
ابعتي لنا رساله
اخد الشباب
و نختفي في مغاره !
*********
ياما قلت لك
ان المحبه مش كلمتين في الهوا
وان الاخوه مش بس ناكل سوى
وان عدوك لو يطول يا ابن الأصول
يحط لك السم جوه الدوا
*********
سيدنا الشهيد
يوصل على المواعيد
ويجيب معاه الجمال
والوطن والعيد
لا يعرف الخونه
ولا يبتسم للعبيد
المسك طالع
من مداره فريد
لا يعرف المستحيل
ولا قريب وبعيد
و هدفه واضح
وعينه ع الجنه
وعارفه بالتحديد
لابس جديد
في جديد
ديما بيوصل
صبح يوم العيد
*********
نفضل نتعلم منك
وندوب في هواك وف فنك
خمسين سنه عدت تجري
لكنك جوه قلوبنا
والناس كلها بتحبك
وعرفنا يا ناصر سرك
حطيت الشعب ف قلبك
*********
ليه خليتني ادوب في هواك
وأحلم اني ف كوشه معاك
فجأه تهد الحلم وتمشي
سنه والقلب بيستناك
*********
صباحك انت
شدو زهور
وطول عمر
العبير والنور
ما يعرف سور
ومن غير اذن
يملا الدور
ويدخل ع القلوب
ويدوب
كما المجذوب
لا يعرف نظام
ولا دور
وعاشق للبنات الحور
ومهما الموج
كان عالي
بيكتب شعر كله بحور
كأنه من جبال النور
ولا مكسور ولا مغرور
وآه على قلب
بات مكسور
*********
آنا من اول ما شفتك
سبت نفسي وجيت لحضنك
والحكايه والقرار بإختصار
قلبي بيقولك .. ب ح ب ك
*********
أحب كل شئ فيك
وانت في قلبي ارقيكي
ولما تغيبي عن عيني
ادخل قلبي اناديكي
*********
يسعد صباح الملاح
لما عبير الزهور
يوصل في قطر الصباح
ويجيب معاه السرور
*********
ومن يوم قلبي ما شافك
وطوق همسك مطوقني
وحار قلمي ف اوصافك
وبحر عينيكي غرقني
*********
قلب الجميله
الابيض الياسميني
من يوم ماحب
وبسمته في عيوني
بتقول كلام
مايترجموه من دوني
انا بحب
والحب عاد تكوني
يا عمر عدى
وبسمه مش عارفاني
ازاي ياعمر
تتحسب في سنيني ؟
*********
يا زهره من فيض العبير
سهرانه وف ليلة رضا
غطست ف أمواج الندي
طار الشجر وحلف ينام
الليله في حضن القمر
وشرب معاكي م
الغدير
*********
يسعد صباحك والنسيم
اللي جاب كل الحنين
ويا العطور والجمال
اللي يتحدى الانين
ويريح القلب الحزين
*********
صباح النقاء في انتظار السحاب
صباح المطر اللي في الحب داب
وصحى الأغاني في قلب الزهور
ونوره حقيقي .. يهد السراب
*********
لسه الشهيد ... واقف على حلم الوطن
بستان امان
نفسه يعود ... ويهد سراديب العفن
ويموت كمان
*********
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.