" مصر الخلود "
،
يانجمة ليل معديه
يانسمة فل منديه
ياقلة على الشباك
بتلالي
ومبسم بيضحك
من ورا مشربيه
وآه ياليل ياعين،،
موال وفنارة ومراكبيه
وسمرا بكفوف محنيه
بشامة على الخد
وحكايه
ضفيرة على الشط
مرميه
وقصة طير بجناحين
فارد قلاعه بين القصرين
وكروان في سكون
المعابد
بيصلي فوق المآدن
حي على الصلاة
يامصر المحروسه
وآه ياليل ياعين،،،
بلد نايمه في حضن
النيل
وبعزف السواقي
ساعة مغربيه
بتغني بنواح ربابه
ودموع سمسميه
وعلى الحيطان أسطورة
شعب إتحدى الطوفان
بهيبة أسود
رسموا لوحة مصر
الصمود
وآه ياليل ياعين،،،
مصر فلاحة برموش
عنيها بتغزل
قصة بلد بين سطور
الأيام بتعشش
حجر فوق حجر
يامصري للسما لاحت
مجد وحضارة
بنور الشمس مضوية
وآه ياليل ياعين ،،،
وعيدان سنابل
بتتمايل
على خطاوي ارواح
مضحيه
وتفضل للأبد هي
عايشه
زي الوشم في
القلوب
هي مصر الخلود
" ومشربتش من نيلها "
،
بقلمي " نونا محمد"
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.