ومين على دنيته..بقلم فهمى على..

و مين على دنيته قادر
يخليها تقول حاضر
و تمشى فى الطابور طايعة
و لا بتعند و لا تكابر
و مين يقدر يدوس الهم
و يشخط فى الجراح تتلم
و مين يوقف بحو الدم
يحارب الفرقة و يعافر
يلم الناس ... يداويهم
يحس اللى انكس فيهم
و يمسك ايده بايديهم
و بانينهم يكون شاعر
و مين يعرف يسوق روحة
فتبقى جنة مفتوحة
كريم فى الجاية و الروحة
و على جهل البشر صابر
و مين راضى يكون انسان
طيابته فى ضحكته عنوان
يفوت جواك بلا استئذان
و يبقى الماضى و الحاضر
فهمى على

•