سيبِك م الماضى
سيبِك م الماضى وأيامه .. سيبِك م الحاضر والامه
خلينا نعيش المستقبل ... وندوٌر فيه على أحلامه
ننسى اللى جرحنا وننسى أساه ...
واللى يفرحنا نروح وياه ...
هنسلم مشاعرنا ف إيده . والقلب يسلم لغرامه ..
سيبك م الماضى وأيامه ...
لو كان ع الدمع اللى ملاكِ .. كان أولى دموعى تغرقنى .
وان حزنك ناره محصراكِ .. كنت ابقى رماد م اللى حرقنى ..
حاولى تطفى الاحزان بدموع ...
والنار بالوقت هتبقى شموع ...
والدمعة هنقتلها بضحكة .. والحزن هنرتاح ف خصامه ..
سيبك م الماضى وأيامه ...
بطبيعة الدنيا انها جارحة . دايما تدى مع الفرح عذاب.
طب ليه ماناخدش الا الفرحة . والفرحة تخلى العمر شباب .
وعذابها ان اثر يوم ف العمر ...
ان طال اليوم ده مسيره يمر ...
واهو يوم ف العمر هايعمل ايه .. والعمر مااطول أيامه ..
سيبك م الماضى وايامه ... سيبك م الحاضر وألامه .
خلينا نعيش المستقبل .. وندوٌر فيه على أحلامه .
بقلم / احمد التركى
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.