☆(ذكريات طفوله)☆
فاكر يا صحبى ايام زمان لما كنا صغيرين
كنا بنلعب بالتراب ونقولوا عليه ده عجين
ياما لعبنا كوره شراب وكنا فيها محترفين
ولعبنا عسكر وحراميه وبيها كنا مبسوطين
لو رحنا مره الكتاب نفضل اليوم زعلانين
والسعاده تملا قلوبنا وإحنا خارجين مروحين
من الطين نصنع ألعاب وبأفكارنا مقتنعين
ياما سهرنا سوا الليل وأهلنا علينا مشغولين
كتير لعبنا ف الشوارع وف الالعاب مخترعين
وكان بيجى فى بلدنا مولد كنا بيه متجاننين
كنا بناخد مصروفنا ونجرى نتعلم بيه التنشين
ونشترى مسدس لعبه ونضرب الناس الماشين
وركبنا ف يوم مرجيحه وفضلنا فيها متعلقين
وأصحابنا تاهوا مننا ولما زهقوا راحو ماشين
وكنا بنقضى أيامنا لعب وبالتعليم مش مهتمين
واما نجمع ف العيد جنيه نمشوا بيه فرحانين
كنا بنقولوا إمتى نكبر وع الحلم مستعجلين
ولما كبرنا شويه ياصحبى لقينا نفسنا متفرقين
الدنيا اخدتنا ف سكتها واحنا فيها بقينا تايهين
بس اللي بينا مش يوم اللي بينا يا صحبى سنين
اسمع منى نصيحه ياصحبى ف الدنيا مش دايمين
بلاش نتفرق تاني يا صحبى دا مرجعنا هيكون للطين
راح يجي من بعدالحياه موت وف الاخره مش عارفين
ها نتقبلوا سوا فى الجنه ولا مش متقابلين
☆☆☆☆☆☆☆☆☆☆☆☆☆☆☆☆☆؛
مبروك علوه
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.