الدنيا وأحوالها.
دعوة للفرح ودعوا الاحزان
(افرحوااااااا)
لو جالك الفرح بيمشى
روح له انت وهرول
ليه بس تأجل فرحة
أوضحكة أضحكها الاول
دنيا قلابه زى موج
البحر فى ثانية بتتحول
لية تقعد ضارب بوز
مهموم ومقريف ومتململ
سببها على الله لا حزن
بيدوم ولا فرح بيطول
لويوم أتعثر بك الحال
أيه يعنى أبدأ من الأول
لو ضاقت عليك الدنيا
فيها أيه بكره هتتعدل
خد الدنيا ببساطة ليه
تقعد تفلسفها وتحلل
ليه تقعد مهموم شاغلك
حالها تفسر وتعلل
انت اللى هتوجع راسك
وهتمرض وتتململ
يوم ورا يوم بنعيش
أحداث بتمر وتتسلسل
الدنيا كده يوم تحت
ويوم فوق حالها بيتبدل
من أيام آدم طبعها كده
لا هتغير ولا هتتحول
الشاعر/ عبد المنعم حمدى رضوان
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.