رحله
من ديوان/ قلم مجنون
للشاعر/مصطفى فريد
رحلة العمر زالت
وحان وقت الحساب
الروح للمولى فاضت
ولا عاد ينفع حجاب
عن عينى الشمس غابت
وعاد كل اللى فات
يرجع قدام عنيه
شايفه كأنه حلم
بيمر زى الفيلم
زود مرار الحلق
العمر زى البرق
والماضى جرحه حى
جوه صداه بيئن
بيحن الكلام للصوت
لسانى قايد نار
والصمت واجعنى
باصرخ فى كل مكان
ماحد سامعنى
دمع العين ما هش راضى
يفط ويحكى بالأسرار
دوايره جوه احساسى
بتتمنى يزورنى نهار
أعوض كل مافاتنى
يجينى الصوت. ويرعبنى
خلاص وقت امتحانك فات
ورقتك للسما طلعت
خيوط العتمة حاصرتنى
غاصت رجلى فى المسافات
مالى فى المسير قرارات
وغريبه شكل الجيران عنى
وغريب كمان طعم الهوا
فى نهاية المشوار
مقفوله كل البيبان
والرؤيه فيها معتمه
واصلنى صوت الآدان
وتلاوة للقرآن
نايم انا وبردان
رغم الغطا موجود
سبع طبقات بتوب دبلان
إيديه فيه متكتفه
وجبهتى متلتمه
بحتة قماش
شايف بعين السراب
صوان نواح منصوب
فيه ناس عارفهم انا
وناس كتير أغراب
فيه اللى قال ملعون
كان عصبى كان مهموم
صوت الوطن همه
وغيره قال فنان
له فى الشعور وجدان
بإيديه حروف الهجاء
مرصوصة كالبنيان
كان كتله من إحساس
ملضوم حروفه بنور
مبدوره فوق السطور
مرسومه وبإتقان
واصفة حياة الغلابه
وعاشقة للأوطان
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.