علــــــــــى فكـــــــــــرة / سليمان دغش
على فكرة شو حلوة الفكرة
انه بكرة جايي بكرة
وبئيدو ذكرى مبارحْ وبالتانية حامل بكرة
وأنا بسأل حالي كل يوم امتى رح ييجي بكرة؟
حتى يرحل ظِلْ مبارح ويتركني أستنا بكرة
مش بكرة تحوّلْ لمبارح ومبارح أهداني بكرة؟!
وأنا ضايع ما بينْ مبارح والصفحة البيضا في بكرة
بتساءل بيني وبين حالي : أنا في مبارحْ والا ببكرة؟
وشو بيفرق عن بكرة مبارحْ لما مبارح يصبح ذكرى
ويصبح بكرة مثل مبارحْ رايحْ وحدو ينطُر بكرةْ
وعلى فكرة شو حلوة الفكرة انو الحُبْ يكون بفِطرةْ
وتذوبني بنار جنونك زي الشمعة قطرة بقطرةْ
وتنسيني ذكرى مبارح واليوم الناطر عم يسألْ
دخلك شو مخبي بكرة
وكل ما سألتكْ إمتى بشوفَك بتقلي استني لبكرة
وبعمرو ما بييجي بكرة الا وحامل بيدو بكرة
وعلى فكرة شو حلوة الفكرة اني حِبَّك عمري كلو
لما انت تكون مبارح وانت اليوم وانت بكرة
ويا ويلي شو حلوة الفكرة لما ابقى بحبّك حرّة
متل فْراشِةْ حول الزهرة
وتنسيني عمري كلو لما انت تكون مبارح وانت اليوم وانت بكرة
وانت انت كلّ الفكرة..
على فكرة
( سليمان دغش)
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.