الدار اللى فضيت
***************
جاى تخبط على باب الدار اللى فضيت
ولسه قايم تفتكر تسأل ع الناس اللى هاجرت
جاى تسأل ليه الأيام اللى عدت مارجعت
مش هاترجع
واللى راح عمره ما ف يوم هايرجع
ولو تقرب من جدار الدار هاتسمع
كل طوبه بتئن وعينيها بتدمع
ولو هتسأل عن الحبايب اللى كانوا فى البراح
هاتقول مش باقى منهم غير شويه من الجراح
والظلام أصبح ساكنها مابقاش بيدخلها الصباح
ومش باقى منهم غير شوية ذكريات
بتحكى حكايات عن عمر فات
والكلام اللى فيها أصبح سكات
كل حاجه إتغيرت جوه م البيت والمكان
والترآب اللى ع الأرض جلد حتى الحيطان
والملامح إتغيرت وإتقشر اللون من ع البيبان
حتى الصور المتعلقه فى التابلوهات
إستجارت م الزمن وعششت فيها الآفات
واللى باقى م الذكريات
شوية كلام متبعثرة جنب الحيطان
وكم حكايه متحجره فى طرف اللسان
وراح كل غالى وإتدفن لما مر عليه زمان
م/محمد بدوى أبوالعلا
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.