اتغربت
اتغربت سنين وسنين
اتغربت عشان ملايين
يا ترى من بعدي
يروحوا لمين
ياما عملنا ومش عاجبين
اتغربت وسيبت عيالي
واتبهدلت نهار وليالي
ولا فيه حد حس بحالي
جبت رخيص وجبت الغالي
اتغربت وقولت هأجيب
قولت هأجيب وهأجيب وهأجيب
قالوا في الغربة هناك هيخيب
الجنين في الغربة ثواني يشيب
سيبت ورايا عزيز وحبيب
في الغربة شربت مرارة الكاس
شكوك وظنون وآلام في الراس
جبت حاجات وهديت الناس
لقي في الآخر كله إنداس
ياما في الغربة يا خلق قاسيت
أعز أصحابي وأهلي نسيت
خمر وبيرة ليالي حسيت
لربي وديني بجد عصيت
قولت أبنيلي كده كام بيت
بنيت البيت وإخواتي أخدوه
طمعوا في الباقي وقالوا كادوه
بعد الغربة رجعت لبلدي
بقيت محتار بين بنتي وولدي
أصحاب أحباب مبقاش عندي
سرقت مني الغربة سنيني
قتلت فيا حتى حنيني
والخلق في حالي مش سايبيني
لقيت الصح أراجع ديني
جيلاني أنور
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.