ياابني بوصيك
يا ابني العلام في الحياه
في اي عمر يكون
الجهل يفضل ملازمك
دا العلم على كل لون
اصل الحياه مدرسه
تعلمك والعلام مضمون
ياما فى الحياه هتقابل
امور كتير فى الكون
واللى يخون مره احذره
عمره بحاله يخون
ويغور قليل الاصل
ويخفي العويل الدون
لا تصحابه ولاتناسبه
ولا تحسن بيه الظنون
وناسب ولاد الاصول
واظفر بذات الدين
وحط ايدك فى ايد
الاصيل للعهود هيصون
وليه تتبع عيوب الناس
للناس ودان وعيون
واحفظ جميل الناس
واشكر وكون ممنون
وعامل الناس بالحسنى
وكون للغلابه عون
وراعى جارك واحفظه
الشاطر اللى يصون
وخلى الحلال مطعمك
تفضل عزيز ومصون
واحفظ ايديك وعن
الحرام عفها مهما يكون
واحفظ بنات الناس
عرضك هيفضل مصون
والسر صونه ومين امنك
عمرك يوم متخون
واحفظ شبابك لهرمك
التقوى تاج ميمنون
اهلك لا تهلك دول حصنك
مهماجرى ويكون
ربك يحبب فيك خلقه
اهم شيء فى الكون
الشاعر / عبد المنعم حمدى رضوان
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.