دم الشهيد
،،،،،،،،،،،،،،،،،
دمك يا ولدى مش رخيص
دا مستحيـل يـروح هــدر
يا ولدى طول عمرك شجاع
زاهد متاع الدنيا مؤمن بالقدر
حارس آمين طول السنين
صاحب أراده عمر قلبك م انكسر
كنت لما يموت شهيد وتودعه
كانت دموعك تنهمر زى المطر
كنت اشوف الدمع فى عيونك
حزين وقلبك من الحزن بيتعصر
لما كنت باسالك عن حال ولدنا
ع الحدود كان جوابك مختصر
كنت ببكـى لمـا كنت باسمعـك
دايمـا تقول وطنى فى خطـر
كنت باشعر بالامان لما بسمع
غنوتك يوم السفر
كانت ألاراده من حديد
كان الشعار الحـق لازم ينتصـر
قاتل جبان للعهد خان شايل حزام
نأسـف علـى قلبـه رايـح ينتحـر
وقت الأذان الصمت خيم ع المكان
فرحان وبيكبر فاكر إنه انتصر
ميـن دا يا ولـدى اكيـد شيطـان
دا مستحيل يا ولدى يكون بشر
يقتـل أخـوه وقت الأذان الدم هان
والرايـه سـودا بيفتخـر
يقتل أخـوه حامى حماه طوق النجاة
وعن العـدو يغض النظـر
القدس تدمى أيها الجهلاء هيا
القدس أمست فى خطر
نقتل بعضنا باسم الجهاد
زورا وبهتانا وعدونا يجنى الثمر
اما من رجل رشيد ؟ أيا صلاح الدين
ألم يولد فينا عمر ؟
الفتنة أكلت كل شيئ فيك يا وطنى
الفتنة لا تبقي ولا تذر
دمك يا ولدى مش رخيص
دا مستحيل يروح هدر
،،،،،،،،،،،،،،،،،،،،،،،،،،،،،،،
كلماتى
المهندس / حسن سعد السيد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.