أرض الحبايب
بقلم : حسام الدين فكري
**************************
تحت وهَج الشمس الحامي
يا بو الجمال الخطير
كُلّ عُشّاقك مساكين
واقفينلك طوابير
أنا من بعيد، بصّيت عليهم
وما قرّبتش...
أصلي بصراحة مليش ف الحرّ
ومليش كمان ف الطوابير !!
أنا ف حُبّك أناني
ومحبش أشارك حدّ
ومفيش غيري تاني
هيكون ليك بجد
لا تقول بقى أصحابي وزمايلي
وده معرفش إيه
كُلّه كلام يا حبيبي عجيب
أنا مفهمش فيه
مهو برضه أنا لو قُلتُه
مش هتوافق عليه
يبقى نخلّينا مع بعضينا
ولاّ رأيك إيه ؟!
أنا زي ما خلّيت عُيوني
ما تشوفش غيرك بسّ
عاوزك إنت كمان
يا عُيوني...
تحلم بيّا وبسّ
عِيش الدنيا الواسعة ف قلبي
جُوّه قلبي أرض الحبايب
مهما تغيب عن عيني يا حُبّي
برضه هيفضل قلبي دايب
أنا اللي بيك ولهان
وبقربك دايماً فرحان
كُلّ حياتي هعيشها عشانك
وأملهالك دفا وحنان
إنّما تقول لي خلّيك معاهم
خُد دورك تحت الشمس
هنا بقى أرفعلك "فيتو" !
وأقولك كدا كتير
وارجع تاني أفكّرك
أنا مليش ف الحرّ
ومليش كمان ف الطوابير !!
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.