ليه ياقلبي تعيش ضحيه
وترضىٰ بعيشة العشاق
نظره واحده وكانت هيه
وقّعتك وبقيت مشتاق
أنت كنت منتظرها
نفسك تجرب الأشواق
حيرتني ياقلبي معاك
وعلمتني سهر الليالي
وأفضل سرحان بالساعات
وصورتها ساكنه فى خيالي
مش قادره تبعد عن عيوني
طول الوقت شاغله بالي
وقت ما تحرك رموشها
تحرك معاه مشاعري
عيوني دايما بتراقبها
ألقى عقلي يقول دا قدري
لو تغيب عن عيوني لحظه
ألاقيها ساكنه صدري
وبتتسحب فى وريدي
وكأنك ياقلبى ما تدري
أحس برعشه إيديا
وهي فى وريدي بتسري
هي دي عيشة العشاق
دايما سهران ويا قمري
ليه قبلت تعيش ضحيه
كان لسه علي بدري
(((أسامه جديانه)))
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.