مرايتى
*********
انا لما بصيت فى المرايه
شوفت واحده مش انا
يمكن تكون تشبهلى
لكن. الحقيقه مش انا
انا شوفت صوره بهتانه
وعيون حزينه ودبلانه
وملامح ناسيه ضحكتها
حزنت عليها بامانه
سالتها ليه حزينه
وساكته ليه ومسكينه
ردت عليه وقالتلى
انا واحده نسيت فرحتها
والايام ياما ظلمتها
والكل راحوا وسابوها
ولاحد فكر فى سعادتها
انا السعاده فارقتنى
ولامرة فى العمر زارتنى
والحزن عارف سكته
والحسرة فى قلبى ملكتنى
بكيت لحالها وواسيتها
ومديت ايديا اسكتها
لاقيت ايديا حضنتنى
ودمعه من العين نزلتلى
لقيت نفسى بواسينى
واللى بكت تبقى دى عينى
ولا لقيت اللى يواسينى
حضنت جراحى وانينى
وصعبت على كل سنينى
اللى راحوا من عمرى كتير
خليكى شاهده ياسنينى
انا عايشه فى قلبى حزن كبير
ودعت مرايتى وقولتها
انى عمرى ماهبصلها
وكفايه انى قدامها
بتفكرنى انى لحزنى اسير
********************
راوية حسن
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.