أغضب
من ديوان/ سيبنى أحلم
للشاعر / مصطفى فريد
إغضب
قد ماتقدر تغضب
إغضب
أنا مليت إحساسى بضعفك
ثور. اتعصب
يمكن تلقى فى إحساس غضبك
نشوة تكمل بيها فى طبعك
رمز رجولتك
عايزاك تعرف
أنا مش هامش جوه حياتك
أنا مش تابعة لممتلكاتك
أنا إنسانة.
ليا مشاعر
ليا وجود
ليا حدود مرسومه بإيدى
أوعى تفكر
لما تثور قدامى راح أضعف
أو استسلم
إغضب.
إبعد
إهدم أى مشاعر حلوة
بنيتها معاك
إنسى دموعك
يوم ما سامحتك على خطاياك
جرب مره مشاعرك تغضب
لحد ما تصبح جواك نار
تحرق كل مشاعرى
وتلغى وجودك فيا
وزى ما حبك
علم قلبى ازاى يحتار
أنا علمت مشاعر قلبى
إزاى يختار
أهم قرار
لو جواك هتكون الجنه
أهون ليا أعيش فى النار
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.