... تخاريف ...
حدوتة تخلص تبتدي
من تاني بعدها حدوتة
وف كل الحواديت
هي هي نفس الموته
أنا عاشق وحكايتي
فيها المر متكرر
لا شفت منها ضحكة
وكاس عشقها ممرر
تشغلني حورية
م الجنة يتجن عقلي
تشغلني أنسي حياتي
وأنسي عمري وشغلي
أقول أنساه ألقي
النسيان سوقه بعيد
أرجع وهي ف قلبي
عايشها كأنها العيد
وأحكي حكاية عشقها
حدوتة في كتبي
صفحة لقا ومعاه وعد
تنور بنور ضيها دربي
وصفحة بعد أعيشها
ف أحلامي كأنها جنبي
وأسأل الأحلام عاللقا
تقوللي اللقا بكرة
تنسيني يادنيا طبعك
لما تنسي فرسانك
وتاخدني وأنا العزيز
يسقيني الذل سجانك
وأنا إللي كاتب علي
كل دروبك إسمي
صورتك في قلبي
خفيتي ليه رسمي
كيادة من يومك
وهجر الحبيب طبعك
يادنيا ما تتلمي
وخداني ليه ف طمعك
راضي أنا بالمقسوم
لو كان عيشك وملحك
لا طلبت أكون سلطان
ولا عزيز علي أرضك
ولا يوم كنت حاكم
أنا محكوم هنا بأمرك
أغمض عيني وأسرح
في ملكوت حلمك
أصحي علي صراخ
برئ صرخته من ظلمك
ذنبه إنه يوم عشق
وخده جنونه لحبك
سراب والعطش غالب
وصلت ما لقيت غير عطشك
ياصاحبة عشق المجانين
نداهه تاخدنا وراها سنين
نفرح ونقول إحنا م العاشقين
أتاريكي وهم وفيه عايشين
وقف قاضي الزمن للمظلومين
نصف الجاني واحنا مسجونين
ودي حكايتي ودي حدوتي
وف كل زمن نحكيها لناس تانيين
كان ياما كان من زمان
حكاية والبطل كان إنسان
شاف بالأمل حبيبة من الجان
راح وراها وده كان عنوان
أما البقية جوا ضلوع إنسان
حبة عضام في قبر ماله مكان
.... أيمن بلال ....
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.