ما تختبرشي
ما تختبرشي ف وقت الشدة
أصحابك
ولا تمتحنهم واصبر
ع اللي فيك صابك
لم الشراع
لحد النوة ما تعدي
والرعد يسكن
وعود للشط بجرابك
طول حبالك
ومد الصبر ع الآخر
لما الأمور تنجلي
وتثبت على كعابك
ما تنتظرشي الوفا
جايلك على حصانه
ويزف ليك الفرح
ويدق أبوابك
ف وقت الشدة
هتلاقي كلهم سقطوا
والكشف منهم خلا
ولا صاروا فى حسابك
كإن صابك جرب
والكل بيتهرب
مع إن طول عمرهم
بيتحكوا في ثيابك
كتير منهم
هيتلاشوا وهيدوبوا
والبعض غيرهم
هيتجنى ويغتابك
اعرف وصدق إنك
ف الهموم وحدك
لا إيد تساعدك
ولا فيه حد يدرابك
الكل شايفك تقاسي
اوعى تندهله
ابن الأصول الوفي
هو اللي يسعالك
الشدة نار تصهرك
وتجلي فطرتنا
وتسقط الأقنعة
وتعري خطابك
إكفي الماجور
وسبب الحال على حاله
وعيش في وهمك
وقول الكل أحبابك
خلي اللي نايم نايم
واضحك على روحك
ومهما شد الألم
عض على نيابك
فيه ناس معاك
هتجرح فيك وتتشفى
وناس هتفرح
وناس تتسلى بعذابك
ما تستجديش
ولا تتعرى بهمومك
وعز نفسك
وقوم اقفل عليك بابك
لا تنتظر وتقول
نخوة ولا مروءة
سلع وبارت
وعافها الدهر قدامك
انسى الشهامة
ولا تعول على رجولة
ولى زمانهم
وقوم احفر بمخلابك
روح امشي جنب الحيط
اتخبى وادارى
ما دمت صرت وحيد
اسجد في محرابك
واوعاك تلومهم
ولا تعاتب
ولا تحاسب
عتابك الندل
أصعب م اللي بيه صابك
احمد محمود عوض سعيد
الرحامنة / فارسكور / دمياط
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.