خطاوى الأمل
**************
بدأت خطاوى الأمل
تعرف طريق النور
ودوافع المحتل
جايه ف كاس بنور
والدور عليا اشتهى
طعم الأمان والحُب
واسمع رنين ضحكتى
خارج حدود القلب
بدأت سواقى الأمل
تروى الشراقى البور
والدور عليا يطوف
ضى القمر ف الليل
واكتب بأحلى حروف
فاتت سنين الويل
تاه القلق والخوف
والشهد حلى الجوف
وأنا عندى ألف دليل
ودليلى وقت المحن
بلقى الفرج ع الباب
وان هم سيف الفتن
يقطع حبال الصبر
ويقول لإيد الزمن
تحفر لقلبى االقبر
بسمع لسان السما
بيقولى صوت كداب
وف قلبه نبض عليل
أوعاك تآمن ليه
وتبص يوم ف عينيه
طول ما الأمل موجود
والعود ياواد مفرود
شمس النهار هتبان
وتشوف شموع الهنا
والورد ع الأغصان
شايل ف إيده الأمل
وستاير النسيان
وبصوت رقيق بيقول
عيش الحياه يا جميل
*******************
رضا أبو الغيط
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.