* ـ زجلية مغربية تحت عنوان
***صفي تشرب***
صفي يا بنادم تشرَب
نَقي ب لخير ؤ لَمْحبًة...
ذاك لَعْقل ؤلْقلب
فكر فِ إخوانك
كْسيهم بِ لَمحنًة راهم غْطاتك
خوذ بِديهِم ؤُ طَبطِب
قْبَل مَ تخَطفك لِيًام ...
فسَوًل لَمْجرب
غَرًاتك الأنا و لفاضي
سَنًك مكَشِرْ ماضي
دًاخل منهوك...
عامَر خُبث وَ شْطَب
اه يا مي لحبيبة
تْشَتات جْماعة ؤ مَ بْقات طيبة
سَيجوها بِ نَار و زْرَب
ؤُباشْ مَ قَدًتْهم لَغْبينة
زادوا لَحْجَر لَحْطَب
اه، يا مي لحنينة
نْفاق وَلاً موضة ؤ لغذر ؤضغينة
لا رحمة بقات ؤ فاض جْرَب
اَشْ هاذْ دُنيا لْمَجنونة،
واش هاذ لعجب ؟
فَصَفي يا بنادم تَشْرَب
ؤ لِشَتيه باغي يتْعلم عليك تْبَوْرِيدَة
عرَف أَنً عَوْدو خْشب
لَمْحَبة وَلْخاوة مَ تْباع بِ ثَمان
سَوًلْ حكمة المجدوب ؤناس زمان
سول الحرف واللوح والقلب
ؤعوض تزرع السوس
لْفُرقة وَ لَكلام لْمَسوس
زْرَع لَمْحَبًة ؤُ جَرِب
سقيها بِ صْفا والنية
بلا زواق ولا نفاق الحية
ؤ مَنْ مُول سبع وْجوه لا تْقَرب
ناس حال ؤ حْوال
هذا غير غادي، لا بال لا خيال
وهذا زاد فيه زاغ ؤ مَال
ؤهذا طارت منو الحشمة ...
لبسوا الطمع ،نْسى أصلو ؤتْغَرب
فصفي يا بنادم تَشرب
شيطان وليتي تنهب وتكذب
ما قلتِ حْشومة مَ خُفْتِ الرَب
بارك من مْضيغ لْهضرة
راه لقلوب ظَلْمات مكوية ب جمرة
الفردانية وَلاَت دين وَ نبرة
براسي يا راسي تْكَسْرات لْجَرًة
فماتت لمحبة وتْجَوًف لقلب
فصفي يا بنادم تشرب
شد بالله
عنداك تطمع في سواه
دير الخير و نْساه
نقي بالخير ؤلمحبة
ذاك لعقل ؤلقلب
فصَفي ي بْنادم تَشْرب
***الأديب والشاعر: أحمد الكندودي ***المغرب***
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.