أنا الطيب
………..
أنا المطحون
أنا الطيب
لا خانك يوم ولا فرط
أنا إللى شايل فوق كتافه همك
مربوط ف ساقية
مش بتدور
ويدور
لما داخ
وقف ياخذ نفسه
ليه ينام كل ليلة حزين مهموم
عشان شريف
لا بيسرق ولا بيتسول
يصحى الفجر يتتعطر بترابك ويتيمم
يصلى فى محرابك ويتركع
لا عمره قال اه ولا أتوجع
شاكر وحامد ربه
صابر وراضى
باللى ترضى بيه
حنى عليه شوية
ومدبحيش جواه حلمه
مدى إليه الايد
ولمى من جواه حزنه
إبنه شهيدك
إللى بيدافع عنك
طول السنين
أنا المطحون
أنا الموجوع
أبنى فيك كل يوم وأعمر
أدوس ع الصعب
أشيل سلاحى
ومهما طال الليل عليك
أجرى وأعبر
أغنى
أجبلك لك نهار
مفرود بطول البلاد
زى نيلك
واولاد بيرسموا على الحيطان وشك
قمر وشجر ونيل بيجرى
وبطل مصرى
رغم إنه تعبان مهموم
مرضيش ليك بالهوان
ماهنش عليه تباتى مكسورة حزينة
تمرد
وعمل زلزال هز العالم من حواليك
ورجعلك حقك
بيضحكلك
بيرسم البسمة على وشك
ووجوه الولاد
وراسم لك
بأيديه الاثنين
علامة
الأنتصار
……………
بقلم // جمعه عبد المنعم يونس //
30 / 6 / 2018
مصر العربية
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.