طنش يا مطنش
-------------
ماشي في حتتك
مطاطي
والخوف من بكره ،، مالي سكتك
تك خيبه في حضرتك
لما خيال يلبش جتتك
وحروف الخوف
تبقي مخدتك
********
طنش وعيش
لو كانت شيش ولا بيش
دي دنيا فانيه اخرتها تفنيش
فنجر وأتغندر
بعزق أحزانك واتنطط تنطيط
وصبح صباحك بالضحكه والتفاريح
الالوان كتير
خلي الفرحه عنوانك
والضمها عناقيد
ارقص علي نبض قلبك
نبضه ،،،نبضه ،
هيص
واحضن لياليك
دي لفه واحده
وبعدها مفيش
***********
ان طنشك الحب
اسعي تلاقيه
وان فاتك القطر
اركب الريح
وأن جالك الصبر
اظرفه يروح مايجيش
جمال العمر انك تعيش
دي لفه واحده
وبعدها مفيش
******
طنش
ومتقلوش مطنش
خش ع الدنيـــا وكوش
اياك تبخل وتحوش
كفياك تحريم و تعطيش
الحيــاه حلوه قضيها فرافيش
دي لفه واحده وبعدهــــا مفيش
************
صلاح الحجري
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.