مصدقتش
من ديوان / فيلسوف
للشاعر / مصطفى فريد
مصدقتش يا قلبي زمان
لما قلت لك مرة
ما هياش ليك
شبكت فى نص ضحكتها
ولعبت بيك
رميت نفسك
فى بحر دموع بلا مجاديف
بكل خضوع
كده بإيديك
نسيت اني حافظت عليك
حميت دقك من النهجان
رميتني جوه نار بركان
مشيت جواها ومغمض
شفت الدنيا بعنيها
ومش بعنيك
هنت عليك
تسهرني. ٠٠ تبكيني
تحيرني ٠٠ وتقتلني
وانا الخايف يا قلبي عليك
نسيت سهري وانا باداديك
تطبطب إيدي على نبضك
عشان تهدى
تهت وتاهت الفكره
فى وسط محيط
غويط ضلمه
بعت ماضيك وأحلامك
وأيامك ٠٠٠
هجرت البيت
وسلمت الالم مفتاح
يسهر فى الليالي عنيك
بعت شريك.
بروحه شاريك
وسبت الكدبه تسكن فيك
وتنصب فخها جواك
بنص الضحكة وتزيف مشاعرها
اللي حلفت انها بتهواك
وخليت بيك
ومن تاني يا قلبي هاقول
نص الضحكة براني
والنص التاني مش موجود
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.