أرض البكاره........للشاعر/ مصطفى فريد

أرض البكاره
من ديوان / وراح الخوف
للشاعر/ مصطفى فريد

من ارض البكارة والطهارة والصلاح
جاى وشايل فوق كتافى
حب وافى
وجوة صدرى
قلب دافى
وورده من نور الصباح
جاى أهنى العيد وابارك
الف ميت مليون تحيه
من قلوب طاهره وذكيه
للحبايب إيد فى ايد
من زمان مربوط هلالنا
بالمودة مع الصليب
شعب واحد
قلب واحد
تاريخنا واحد
دمنا فى نفس الوريد
طول عمرنا
تجمعنا اوقات الصلا
نركع سوا
جوة الجوامع والكنايس
لاجل حبات المطر
تنزل وتغسلنا سوا
احنا والزرع اللى عطشان للنشيد
وقت الخطر نتلم دايما كلنا
ونضحى لاجل الخير يعيش
ومصر دايما هى خيرنا
وخط سيرنا
لو تعيش نفصل عزاز
وفوق ترابها مكرمين
انتوا منى وقلبى منكم
جوة منه الشوق حاضنكم
ايه تاريخنا وإيه تاريخكم
طول عمركم ايدكم فى ايدنا
عيدكم من زمان عيدنا
فيه الفرح واعدنا
سواعدنا تخطى لفوق
وإيد الرب فوق ايدنا
تساندنا وتحرسنا
وتحمينا من الفرقه
وتكتبنا مع السجاد
فى الصلوات
من الحكمة نكون لمه
ونصبح عنصرين أمه
هدفنا الوحدة واللحمة
ومصر تكون على القمه