( يوميات زوج ايام الحظر) كلمات/صبري حسين
*******************
اخيرا اخد اجازة
هنفذ ايام الحظر
قولت ارتاح شوية
من صحيان قبل الفجر
انام واقوم على راحتي
أعيش بحرية في بيتي
ما انا الملك في مملكتي
العيال وأم العيال كلهم رهن اشارتي
اول يوم
صحيت بعد الضهر
من كتر النوم جسمي متكسر
نقول ايه حاجة تحسر
نزلت من على السرير
ناديت بصوت جهير
يا أهل البيت عقبال ما اخلص الحمام
عاىز الفطور التمام
ماسمعت غير صدى صوتي
خلصت حمامي وخرجت
انادي بصوت عالي
يا ام العيال فينك تعالي
فين الفطور
ياولاد فينكم مش سامع لكم صوت
ناديت وناديت
ماسمعت رد
فتحت البيبان
لقيت الكل لسه نعسان
بصراحة حصل عندي جنان
يا أهل البيت
العصر على الابواب
لسه بسلامتكم نايمين
يا ام العيال
بالذمة ده كلام
فتحت عنيها بالعافية
تمتمت بكام كلمة
مفهمتش منهم حاجة
صرخت بعلو صوتي
قومي سمعيني
ايه بتقولي
الوش اتحول
صرخت في وشي
هو من اول يوم لك في الحظر هتقرفني
شوف يا ابو العيال
البيت ده له نظام
يارب تفهم الكلام
احنا بنسهر طول الليل
بنام اول النهار
انت كنت مشغول في شغلك
كنا عارفين الأمر موش يهمك
علشان موش ازعلك
هاقوم افطرك
بس الكلام ده النهاردة وخلاص
قامت كتر خيرها
جهزت الاكل
لكن منين اجيب نفس
انا موش بعرف اكل لوحدي
لازم حد يفتح نفسي
تعالي يا حبيبتي
الفطار شاركيني
ضحكت وقالت شكرا يانور عيني
افطر انت لوحدك
انا هفطر مع العيال
لما يقوموا من النوم
خلاص ياستي
مش عايز افطر
بصراحة كلامك جاب لي قهر
هستني لما تصحوا كلنا نفطر
رجعت للتمتمة تاني
انت شكلك مش ناوي
تجيبها لبر
لله للامر
يا حبيبي عايزين نعمل اتفاق
عايزاك تهدي من نفسك
بلاش تحط بوزك في كل حاجة
لو حبيت تصحى بدري
انزل اتمشى شوية
بلاش تزعج كل البيت
ملكش دعوة بالمطبخ
موش تفضل داخل خارج
بالتلفزيون اشغل وقتك
عايزاك تكبر مخك
عاىزة اقولك حاجة كمان
اهدا شوية على العيال
بلاش هاتي يابت هات يا واد
ياحبيبي مش عايزك تزعل مني
خلي ايام الحظر على خير تعدي
بلاش تزود همي
خلي بالك من الصوت العالي
طبعا عارف يا ابو عيالي
أن ضغطي دايما عالي
عاىزة اعرفك بكل وضوح
اهم مافي الموضوع
الكلام اللي مافهوش رجوع
طول ما احنا نايمين
بلاش تزعجنا بالتليفون
دايما وطي صوت التلفزيون
ياربت يا حبيبي
تخدم نفسك بنفسك
اعرف انك في البيت
موش في مكتب سيادتك
عاىزة اعرفك حاجة كمان
احنا موش في قهوة ولا كافيه
يعني ممنوع في البيت الدخان
انا بسمع الكلام وانا في حالة ذهول
ياحبيبتي ده موش معقول
انا والله من كلامك مذهول
انت عمالة تعطي في أوامر
انا على كدة موش قادر
ده بيت ولا معسكر
انا صبري له آخر
حرام عليك يا روحي
ماتخلنيش اطلع من هدومي
ده اول يوم في اجازتي
خلتيني كرهت نفسي
هتتحكمي في في بيتي
ياحبيبي دي قواعد البيت
نفذها خلي المركب تمشي
والله ما كنت عايز اجازة
منك لله يا كورونا
على رأي المثل خلتيني
غريب في رسط بيتي
ممنوع اطلع صوتي
انا ايه اللي يغصبني
لازم اهرب بجلدي
اقبل ما امسك الصاجات
والف الشوراع والحارات
اغني واقول انا اللي جبت ده كله لنفسي
انا اللي جبته لنفسي
من بكرة هكسر الحظر
اروح من تاني الشغل
هسلم امرى لله
الكورونا ارحم
من اني اكون في بيتي اسير
انا عقلي خلاص هيطير
يارب عدي الايام على خير
ماتزوذ ايام الحظر
انا خلاص فكري احتار
مع أول ساعات الحظر
عقلي فك وطار
يارب لك الامر
صبري حسين
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.